Bei dem alle zwei Jahre stattfindenden Mundartwettbewerb auf der Sickinger Höhe erreichte Räuber-77-Mitglied Rudy Kupferschmitt mit seinem Gedicht Schää, dass’d do bischt zusammen mit Lenz Matthias Zech den 1. Platz in der Kategorie Lyrik.
Räuber-77-Mitglied Manfred Dechert belegte mit Wie schääs do leit den 2. Platz in der Kategorie Prosa. Den 1. Preis erhielt auch in dieser Kategorie Lenz Matthias Zech.
Wir gratulieren herzlich und freuen uns das Gedicht von Rudy Kupferschmitt und den Prosatext von Manfred Dechert veröffentlichen zu dürfen.
Rudy Kupferschmitt
Schää, dass’d do bischt
Schää, dass’d do bischt , moin Bu.
Was hab isch misch g’fräät,
wie der Klää uff die Weld kumme is.
Mer is es Wasser in die Age g’schosse.
Wie er älder worre is,
is es dann a emol bassiert,
dass isch denn Babbsagg am liebschde
in de Luft verrisse hett.
Awwer rischdisch komisch war’s erscht,
wie der Rozzleffel ganz annerscht worre is,
ned mer der rifflisch, pigglisch Kerl.
Do habb isch nimmi gewißt,
wu isch dro bin.
Er hott sisch g’schmingt,
is ete petete worre
un isch hab gedengt,
aller dann, moin Bu is schwul.
Awwer donn wollt er kään Bu mer soi.
Er hott sisch voll uff Mädel hergerischt.
Is mid de Schdeggelschuh aus emm Haus gange
un hott sisch Silikon in die Bruscht schbrizze losse.
Donn is die groß OP kumme.
Er is hie gange als moin Bu.
Un wie er widder wach worre is,
do hab isch moi Kind in de Arm genumme
un isch hab g’heilt wie en Schlosshund.
Schää, dass’d do bischt, moi Mädel.
Manfred Dechert Wie schääs do leit Wie schääs do leit, es Petra. Fascht wie so e Skulptur im Museum, die Aue ganz starr, unn die Hänn.... So wie e Wachsfigur, wo no was greift. So kenn ichs gar net, es Petra, des hot doch immer gebabbelt wie e Wasserfall, unn, das ich mi schaffe soll, domet es e neier Kihlschrank, unn e größerer Fernseh kriet. Ich mach nix im Haushalt, ich hock zuvel vorm Fernseh, unn ich – chatt zuvel. Ja, eemol, zwemol hots bei mer im Zimmer was schtehne ghert. Was meensche, was do los war. „Du Hurebock, Du hinnerhältiche Kreatur, betrügsch mich mit dene….“. Dobei hots Petra jo aa nimmie vel gmach, dogelee hots, aa wie e Brett, ja, e Wachsfigur. Mid wärs, es Kreiz tut weh, oder es erinnert sich widder an des Autokino, wo es mol eener begrapscht hätt, bis es geflicht wär…. Immer widder Autokino, immer widder wehes Kreiz, immer widder guck ich zuvel Fernseh, kanns sichs nix leischte, wee mer. Ich kannts nimmie here – Fernseher lauter, awwers Petra aa. Her uff, han ich gsat, des metem Autokino han ich schun fuffzichmol ghert! Dann hersche es ewe e eenefuffzischtes Mol, hots geplärrt, unn, was des met dem Chat do soll, was des fer welche wärn. Welche, wo net immer Koppweh han, e wehes Kreiz, unn metem Autokino aafange, han ich gmäänt, wo wenischtens noch was geht. Hot des gplärrt, immer lauter, unn ich hann bloß gsat: „Petra, jetzt reichts, her uff“. Doch es hot net uffghert, ich wär noch schlimmer, wie der im Autokino, wo rer so weh gmacht hot. Do hann ich nimmie gekennt – hanns Petra abgstellt, gedrickt han ich, so e Kraft, no hots nogeloß. Do leits do, wie e Skulptur, unn die Hermine hot mich groß aageguckt, was hotse dann, die Katzemutter, unn ich han bloß gsat: „Sie is jetzt ruich, Hermine. Mer hätte unser Ruh, wann net….E Daa später schun ehr Chef aarufe tät, obs krank is, es macht halt so e Teilzeitschtell. Oder ehr Schwester, oder ehr Freindin, oderoder…..Dann, spätestens no, ee, zwee Daa – kummt die Polizei, Hermine. Dan sehn mer uns nie widder, mei Mad. Ins Gefängnis dürfe kää Katze nin. Bloß die dumm Schnall met ehrm Autokino, nää, so darf mer jo net redde. Es Petra kummt vielleicht als Geischt in die Zell. Drum kumm nochmol uff mei Bää, mei Mad, unn, dann schlofe mer in. Vielleicht isses jo bloß e böser Dram gewest…..